Espainiako Pediatria Elkarteak ikasgeletan maskara pixkanaka kenduz joateko egutegi bat aurkeztu du gaur, komunikatu bidez. Dokumentuan, besteak beste, proposatu du ikasleek maskara kanpoaldean erabiltzeko derrigortasuna «berehala» kentzea, eta barrualdean pixkanaka kenduz joatea. Izan ere, Quique Bassat lantaldeko koordinatzailearen arabera, «inkoherentea» da haurrek patioan maskara erabili behar izatea kalean derrigorrezkoa ez izanda.
Bassaten arabera, aurrez aurreko eskolatzea «oso garrantzitsua» da ikaskuntzarako, eta, normalizazio bat lortzeko, «eskola eremuko prebentzio neurriak pixkanaka kenduz joan behar da, komunitate bakoitzaren egoera epidemiologikora egokituz». Horrela, prozesua taldeka egitea proposatu dute pediatrek, Lehen Hezkuntzatik hasita, betiere aireztapen protokoloak «indartuz». Horrekin batera, txertaketa sustatzearen alde agertu dira, «batez ere» 12 urtetik beherakoetan.
Dokumentua osasun eta hezkuntza erakundeei bidali diete, eta, egutegiaren arabera, Lehen Hezkuntzako lehenengo eta bigarren mailetako ikasleak otsailaren 28an hasiko lirateke barrualdean maskara ez erabiltzen. Martxoaren 14tik aurrera izango litzateke hirugarren eta laugarren mailetakoen txanda, eta martxoaren 28an bosgarren eta seigarren mailetakoena.
Bigarren Hezkuntzako ikasleei dagokienez, berriz, apirilaren 25etik aurrera hasiko lirateke maskararik ez erabiltzen, eta batxilergoko ikasleak, maiatzaren 9an.
Espainiako Pediatria Elkartearen arabera, eskoletan maskara pixkanaka kentzeko eredu hori «monitorizazio eredu gisa» erabil daiteke, barnealdeko beste eremu batzuetan ere neurriak pixkanaka arinduz joateko.
