PSE-EEk eta EH Bilduk aurtengo aurrekontuak onartzeko akordioa lortu dute Iruña Okan (Araba). Gobernu taldeak EH Bilduren proposamenak sartu ditu aurrekontu proiektuan, eta PPren haserrea eragin du horrek. Izan ere, sozialistek PPkoen babesa dute herrian 2005etik. Horregatik, Carlos Iturgaiz Araba, Bizkai eta Gipuzkoako PPko buruak bertan behera utzi du Eneko Andueza PSE-EEko idazkari nagusiarekin datorren astean egitekoa zen bilera.
PPko buruak Miguel Angel Montes Iruña Okako alkateari egotzi dio herriko gobernu akordioa «hautsi» duela; erabakiak bi alderdien arteko «leialtasuna» kolokan jarri duela adierazi du Iturgaizek. Azaldu duenez, PSE-EEk ez zuen beharrik akordioa onartzeko, eta erabaki hori hartu izanak sozialisten eta EH Bilduren arteko arteko akordio berriak iragartzen ditu. Horrez gain, «ezkerreko fronte baterantz» doan bide «erradikal» batean kokatu du PSE-EE.
Horrekin batera, Iturgaizek salatu du Espainiako Gobernuak «ETAko buruzagitzak» proposatu dion «erosketa zerrenda» onartu duela; bertan sartu ditu, besteak beste, presoen hurbilketak, kartzelatik ateratzea eta beste «kontzesio» batzuk. Fernando Grande-Marlaska Espainiako Barne ministroaren dimisioa ere eskatu du.
