Espainiako gizonezkoen futbol selekzioak bana berdindu du Argentinarekin, eta Boli Kosta izango du aurkari final-laurdenetan, larunbatean. Unai Simonek, Mikel Merinok, Martin Zubimendik eta Mikel Oiartzabalek hasieratik jokatu dute, eta Jon Moncayola 88. minutuan zelairatu da.
Merinok sartu du gola, 65. minutuan, eta taldea salbatu du horrela. Izan ere, txapelketatik kanpo geratzeko arriskua zeukaten Argentinak irabaziz gero. Argentinako selekzioko Tomas Belmontek sartu du argentinarren puntua: buruz, 87. minutuan. Esperantza berriz piztu du golak, baina ez dute besterik sartu, eta Olinpiar Jokoetatik kanpo geratu dira.
