Goizean bildu da Frantziako Ministroen Kontseilua, eta Jean Castex Frantziako lehen ministroak erran du ostiralean mintzatuko dela Emmanuel Macron Frantziako presidentea neurrien arintzearen egutegia aurkezteko. Izan ere, Ipar Euskal Herriko herritarrak hamar kilometroko tartean baizik ezin dira ibili hilaren hasieratik, eta etxeratze agindua errespetatu behar dute 19:00etatik 06:00etara. Castexek ez du zehaztu zein izango diren neurrien arintzearen urratsak, baina Macronek, aste honetan egindako ateraldi batean, adierazi zuen etxeratze agindua atzeratzeko «aukerak aztertzen» ari direla. Castexek segurtatu ez badu ere, erran du balitekeela Macronek joan-etorrien hamar kilometroko murrizketa bertan behera uztea ostiralean.
Bestalde, Frantziako Ministroen Kontseiluak larrialdi egoeratik ateratzeko lege proiektua aurkeztu du goizean. Iragan otsailaren 2an luzatu zuen larrialdi egoera Frantziako Gobernuak, ekainaren 1a arte. Egun horretatik aitzina alarma egoeratik ateratzea aurreikusten du Castexek, betiere, «egoera sanitarioaren arabera». Ekain hastapenetik urriaren bukaera arte «trantsizio fase» bat ezartzea dute asmoa. Hala, tarte horretan Frantziako lehen ministroak aukera izanen du dekretu bidez neurri murritzaileak ezartzeko. Gainera, egoera sanitario larria den Frantziako lurraldeetan larrialdi egoera berrezartzen ahalko du. Lege proposamenak lurraldeen egoera sanitarioari egokitzeko helburua du, Castexek erran duenez.
Lege proiektuak dio mugak zeharkatzeko PCR proba negatiboa derrigortzen ahal duela Frantziako lehen ministroak, «transizio fase» garaian. Horrez gain, mugak zeharkatzeko «txertoa jarri izanaren ziurtagiri bat edo birusa bildu izanaren ziurtagiri bat» eskatzeko eskumena izango du Castexek.
Lege proiektua Frantziako Asanblean aztertzekoa dute ondoko egunetan, «maiatzaren 10 inguruan», Frantziako Gobernuko iturriek hedabideetan zabaldu dutenez.
