Imanol Landa EAJko senatariak Mikel Zabalzaren hilketaren auziaz eta horren inguruan berriki zabaldu den grabazioaz galdetu dio Fernando Grande-Marlaska Espainiako Barne ministroari. Landak gogorarazi du auzia argitu gabe dagoela oraindik, grabazioak «eragin handia» izan duela, eta «sumina eta auzia argitzeko eskakizunak» eragin dituela.
Grande-Marlaskak esan du «zoritxarreko» kasu bat izan zela Zabalzarena, eta auzitegiek eta fiskaltzak ikertu ondoren Gipuzkoako Probintzia Auzitegiak 2010ean artxibatu zuela. Haren hitzetan, epaileak aintzat hartu zuen grabazioa epaia ematerakoan, eta, beraz, «auzitegiei edo fiskalari» dagokie erabakitzea elementu berririk badagoen auzia berriro zabaltzeko. «Hala balitz», Grande-Marlaskak azaldu du Espainiako Segurtasun Indarrek «Polizia judizial» gisa dagokien lana egingo luketeela «kasu hipotetiko horretan».
Grande-Marlaska, 'Zabalza auziaz' (eta Estrasburgoren zigorrez) @berriahttps://t.co/On3tRCNmw1pic.twitter.com/Mg7DJOYXsW
— Jon O. Urain (@olano_urkia) March 9, 2021
Landak erantzun dio Espainiako Gobernuaren esku dagoela «amesgaizto hau amaitzea». Hortaz, «zezenari adarretatik heltzeko» eskatu dio, fiskala aktibatzeko eta auziko espedienteak desklasifikatzeko, erantzukizunak argitzeko. Eta gogora ekarri dio Giza Eskubideen Europako Auzitegiak Espainia zigortu izan duela torturak ez ikertzeagatik. Grande-Marlaskak aitortu du Espainiako Estatua «noizbait» zigortu dutela «tratu txar eta tortura ekintza batzuk behar bezainbeste» ez ikertzeagatik: «Baina askoz gehiagotan ez dute zigortu».
Betoa kongresuan
Grande-Marlaskak Espainiako Senatuan eman ditu azalpenak. EH Bilduk eskatua zuen haren agerraldia Espainiako Kongresuan ere, baina uko egin diote PSOE, PP, Vox eta Unidas Podemosek. Mertxe Aizpurua diputatuak gogorarazi du Kongresuko Mahaiak galarazi egin zuela Espainiako Defentsa ministroari gaiaz galdetzea, eta uste du «estatuak eta gobernuak isilpean» gorde nahi dutela auzia: «Onartezina iruditzen zaigu».
