Eusko Jaurlaritzako Lan eta Enplegu Sailak 2022ko irailaren 6a jaieguna izatea proposatu du. Hurrengo urterako Araba, Bizkai eta Gipuzkoako lan egutegia diseinatzen ari da, eta, abenduaren 25a igandea denez, hura ordezkatuko lukeen beste egun bat aukeratu du. Halakoetan, hurrengo laneguna jaiegun bilakatzea izatea da ohikoena; Jaurlaritzak, aldiz, pisu sinbolikoko egunak aukeratu izan ditu, eta kasu honetan Juan Sebastian Elkanok munduari buelta eman zioneko bosgarren mendeurrena ospatuko da. Jaurlaritzak neurria onartzea falta da, baina, ondo bidean, ez luke arazorik egon beharko.
Elena Perez Barredo Jaurlaritzako lan sailburuordeak eman du proposamenaren berri Ser irrati kateari emandako elkarrizketa batean. Lan egutegian jaiegun kopuru finko bat egon behar du, eta, baten bat igandea egokitzen denean, horrelako erabakiak hartu behar izaten dira. Kasu honetan, dena den, arrazoi objektiboak ere baditu. 2022ko irailaren 6a asteartea izango da, eta lantoki eta hezkuntza zentro askotan udako oporren osteko bigarren lan eguna izango da. Horiek hala, eta Jaurlaritzak onartzen badu, litekeena da hainbat lantokitan oporraldia bi egunez luzatzea.
