Egunetik egunera gibelatzen ari da Antton Troitiño euskal presoa Estremerako espetxetik ateratzea. Duela jada bi aste jakinarazi zuten eritasunagatik kalera aterako zela, 104.4 artikulua aplikatuta hirugarren gradua emanda. Tarte horretan, ordea, Espainiako Espetxe Erakundeek txosten bat egin zuten hirugarren graduaren ordez presoa baldintzapean aske uzteko. Azken horrek baldintza hobeak emanen dizkio presoari, baina aldaketak luzatu baino ez du egin Troitiño kartzelatik ateratzeko eguna. Etxerat-ek baieztatu duenez, Espainiako Auzitegi Nazionalak onartu egin du jada euskal presoa baldintzapean aske uztea, baina fiskalari jakinarazten dionetik bortz egun igaro daitezke presoa askatzen duten arte. Gerta daiteke, beraz, heldu den astera arte preso segitzea.
Etxerat-ek atzo salatu zuen hamasei egun igaro direla jada Troitiño aske utziko zutela jakinarazi zutenetik, eta oraindik Estremerako espetxean dagoela. Elkartearen arabera, denbora tarte horretan lau aldiz eraman dute Troitiño ospitalera kimioterapia saioak hartzera, «oso egoera txarrean». Eri diren euskal presoentzako arreta «duina» eskatu du Etxerat-ek.
