Atzo, Nafarroako Parlamentuak, gehiengoz, Espainiako Gobernua premiatu egin zuen presoak bizitokitik gertuen diren espetxera gerturatzera. Halaber, jatorria edo bizitokia Nafarroan duten presoak Iruñera gerturatzeko eskatu zuen mozioan, eta horri bide emateko plan bat prestatzea eskatu zion. Akordio hori onartu eta biharamunean, Sare eta Etxerat elkarteek eskerrak eman dituzte egitasmo horren inguruan lortu den «adostasun politiko eta sindikal» zabalagatik.
Izan ere, eskuina salbu, gainerako indarrek bat egin dute proposamenarekin. Geroa Baik, EH Bilduk, Ahal Dugu-k eta Ezkerrak aurkeztu zuten proposamena, eta PSNk bat egin zuen. Halaber, UGT, CCOO, ELA, LAB, Steilas, ESK, Solidari, Hiru, EHNE, CNT eta CGT sindikatuek ere bat egin dute proposamen horrekin. Mozioak gogora dakar espetxe legediak berak helburu gisa hartzen duela presoen gizarteratzea bultzatzea eta deserrotzea eragoztea.
Sare eta Etxerat elkarteen ustez, akordio hori «garrantzitsua» da, eta bat egiten du «salbuespenezko espetxe politika behin betiko gaindi dadin Nafarroako gizarteak egindako bultzadarekin». Foro Sozialak akordio hori lortzeko «egin duen lana» eskertu dute, halaber. «Sarek eta Etxerat-ek garrantzi handiko egitasmo hau egiten den unearen garrantzia nabarmendu nahi dute».
