29 urteko espetxe zigorra beteta, aske gelditu da Josu Arkauz Arrasateko (Gipuzkoa) presoa. 1991n atxilotu zuten, Miarritzen (Lapurdi), eta, Frantziako espetxeetan zigorra beteta, Espainiaratu egin zuten 1997an: orduz geroztik, Espainiako Estatuko espetxeetan bete du kondena. Gaur goizean atera da Valladolideko espetxetik (Espainia).
Olatz Lasagabaster, etxean
Etxerat-ek jakinarazi duenez, bestalde, Olatz Lasagabaster Anza Usurbilgo (Gipuzkoa) euskal presoak ez du espetxera itzuli beharko, eta eskumuturreko telematikoa jarrita pasatuko ditu zigorra bukatzeko falta zaizkion azken hilabeteak, etxean. Azaro hasieran jakinarazi zuten Lasagabaster Martuteneko espetxera ekarriko zutela, eta azaroaren 6an atera zen, irteera baimen batekin. Martuteneko espetxera itzuli behar zuen, baina han amentzako modulurik ez dagoenez, etxean bukatuko du espetxe zigorra.