Ganteko Auzitegiak (Belgika) Natividad Jauregi Espainiaratzea onartu du, ETAko kide gisa 1981eko martxoan Ramon Romeo Espainiako armadako teniente koronela hiltzea leporatuta, bertzeak bertze. Paul Bekaert abokatuak jakinarazi du Kasazio Auzitegira joko dutela: «Erabakia ez da behin betikoa». Ez dute helegitea aztertuko duten eguna jakinarazi, baina «hemendik aste batzuetara» izan daitekeela erran du abokatuak.
Ez da Jauregi Espainiaratzeko eskatzen duten lehen aldia. 2004an, 2005ean eta 2015ean Belgikako justiziak Espainiaratzeari uko egin zion iritzita Espainiak Jauregiren giza eskubideak urra zitzakeela. Romeoren senideek helegitea jarri zuten, eta Giza Eskubideen Europako Auzitegiak onartu egin zuen Espainiaratzea, Belgikako justiziari leporatuta ez zuela modu osoan aztertu arrisku hori, ezta Espainiak eskaturiko euroaginduak ere. Belgikak kalte-ordaina eman behar izan zion Romeoren sendiari, eta Ganteko Auzitegiak orduan gibelera botatako estradizio eskaera berraztertu du orain: Jauregi Espainiaratzea onartu dute.
2016an atxilotu zuten Jauregi azkeneko aldiz, Belgikan, Espainiako Auzitegi Nazionalaren eskariz, baina segidan utzi zuten aske berriro. Aurretik 2013an ere atxilotu zuten. Bizitza arrunta egiten zuen Belgikan ordurako.
