Ikasturte berria hasi eta lehen astera, COVID-19an positibo eman du Donibane Lohizuneko (Lapurdi) Urdazuri eskolako irakasle batek. Larunbatean zabaldu zuen berria eskolak berak, webgunean. Ostiralean eman zuen positibo irakasleak, eta, ondorioz, halako kasuei erantzuteko osasun protokoloa martxan jarri dute eskolan. Jakinarazi dute osasun agintaritza eta akademia ikuskaritza lanean ari direla arrisku kontaktuen zerrenda bat osatzeko. «Orain arte osasun neurriak bete ditugu, eta, ondorioz, zuen haurrak ez dira kontaktu gisa hartuak», azaldu diete gurasoei oharrean. Haatik, irakasle bat baino gehiago kontaktuen artean da, eta, beraz, ez dira oraingoz eskolara itzultzen ahalko. «Ahalik eta eperik laburrenean» eginen diete testa.
Pirinio Atlantikoetako akademia ikuskaritzak eta prefeturak erabaki dute eskola irekia atxikitzea, eta haurren harrera antolatu dute «arrisku kontaktuen» artean ez diren irakasleekin eta Donibane Lohizuneko herriko langileekin. Horretarako, eskola desinfektatzen aritu ziren dira. Eskola orduetatik kanpoko jarduerak atxikiak izanen direla jakinarazi dute.
Ikasturtea atzeratua Amezketan
Amezketako (Gipuzkoa) Zumadi eskolan irakasle batek positibo eman du PCR proban, Tolosaldeko Ataria-k jakinarazi duenez. Ondorioz, Gipuzkoako lurralde ordezkaritzarekin eta prebentzio arduradunekin adostuta, 2020-2021eko ikasturtea astebetez atzeratzea erabaki dute: irailaren 14an hasiko dira, datorren astelehenean. Zumadi eskolako gainerako irakasleek ere ostiralean egin zituzten PCR probak, eta irailaren 11ra arte konfinatuta egon beharko dute. «Momentu honetan daukagun egoera kontuan hartuta, iruditu zaigu ikasturtearen hasiera atzeratzea dela irtenbiderik egokiena», esan dute eskolako arduradunek.
