Lluis Puig kontseilari ohiaren estradizio aginduari buruzkoa da Bruselako auzitegiek erbesteratutako politikarien inguruan hartu duten lehen erabakia. Epaiak kontseilari izandakoaren defentsari ematen dio arrazoia, eta zehazten du Auzitegi Goreneko epaile Pablo Llarenak ez duela eskumenik Puigen aurkako euroagindu bat emateko; hori oinarri hartuta, atzera bota du haren aurkako estradizio agindua. Fiskaltzak, ordea, helegitea aurkeztu dio erabakiari.
«Hasieratik esan genuen Auzitegi Gorenak ez zuela eskumenik pertsona eta gertakari horiek epaitzeko. Orain Belgikako justiziak arrazoia eman digu, horrek gainontzeko auzipetuentzako dituen ondorioekin. Zalantzarik gabe, egun handia da guztiontzat», adierazi du Gonzalo Boye abokatuak.
Siempre sostuvimos que el Tribunal Supremo no era competente para estos hechos y personas; ahora, la Justicia belga nos da la razón con las consecuencias que ello tiene para el resto de procedimientos pendientes... sin duda es un buen día para @LluisPuigGordi y para todos
— Gonzalo Boye (@boye_g) August 7, 2020
Epaia jakinarazi eta gutxira zoriondu du Carles Puigdemont Generalitateko presidente ohiak Puig. Twitterreko bere kontuan zabaldutako mezu batean ohartarazi du Espainian ez direla errespetatzen oinarrizko eskubideak. «Hasieratik salatu genuen, eta arrazoi eman zigun NBE Nazio Batuen Erakundeko Giza Eskubideen Batzordeak ere. Orain berretsi egin dute auzitegiek; Gorenak ez du eskumenik gu jazarri eta epaitzeko».
Puigen kasuan bezala, Puigdemonten eta Toni Comin kontseilari ohiaren kontra ere estradizio aginduak eman zituen Madrilek; biak eurodiputatu aukeratuak izanik, ordea, etenda geratu dira atxilotze aginduak, Europako Parlamentuak azken erabakia hartu bitartean.
