Dena ondo bidean, astelehenean da amaitzekoa larrialdi egoera Hego Euskal Herrian. Orduan libre izango da ibiltzea Araba, Bizkai eta Gipuzkoaren eta Nafarroaren artean, baita herrialde horien eta Lapurdi, Nafarroa Beherea eta Zuberoaren artean ere. Haatik, bi egun lehenago, ostiraletik aurrera, zirkulatu ahalko da EAEren eta Kantabriaren (Espainia) artean.
Hala egiteko nahia berretsi dute gaur Iñigo Urkullu Eusko Jaurlaritzako lehendakariak eta Miguel Angel Revilla Kantabriako presidenteak. Telefonoz aritu dira elkarrekin, baina datorren ostegunean Gasteizen aurrez aurre biltzea erabaki dute.
Urkulluk Jaurlaritzari aurkeztuko dio proposamena, eta hark erabakiko du. Revillak jakintzat eman du muga zabalik egongo dela astebururako, prentsa ohar batean.
