«Saminez hartu behar izan dugu erabaki hau, baina ez zegoen beste irtenbiderik. Euskal Herrian eta munduan maiatz eta ekainerako antolatutako ekitaldi guztiak bertan behera geratu edo atzeratu egin badira, ezinezkoa zen gu salbuespena izatea», adierazi zuen Ikastolen Elkarteko lehendakari Koldo Tellituk apirilaren hasieran. Azaldu zuen Ibilaldia, Araba Euskaraz eta Herri Urrats bertan behera geratu zirela, COVID-19ak eragindako egoeraren ondorioz. Herri Urrats gaur zen ospatzekoa, Senperen (Lapurdi), eta gaur baieztatu dute aurten egingo dutela festa horren 37. aldia. Jarri dute data berria: osasun egoerak hala egitea baimentzen badu, irailaren 20an ospatuko dute.
Kalean ospakizunik egin ezin izan duten arren, zuzeneko saio berezi bat eskaini du Kanaldudek, gaur eguerdian.
Zorionak eta eskerrik asko lanean aritu zareten guztioi! arazo guztien gainetik, bikain! @HerriUrrats ospatzeko beste era bat. Orain data berri bat dugu, ilusio berri bat, pandemia egoerak baimenduz gero IRAILAren 20an Senperen elkar ikusteteko eta besarkatzeko aukera izango dugu https://t.co/BswCRBPsWm
— Koldo Tellitu (@KoldoTellitu) May 10, 2020
