Konfinamendua arintzeko fasearekin batera, egoerak aldatzen hasi beharko luke, baina oraindik asko dira aldi baterako enplegu erregulazioan dauden langileak. Atzo arte, Nafarroan 6.583 erregulazio txosten aurkeztuak zituzten.
Manu Aierdi Ekonomia kontseilariak jakinarazi duenez, azkeneko hamabost egunetan zerbait jaitsi da kopurua (hamabi gutxiago), baina apenas nabaritu den aldaketarik oraingoz. Apirilaren 18tik hona, berriz, 300 bat espediente gehiago jaso ditu foru administrazioak.
Araban, Bizkaian eta Gipuzkoan, berriz, 26.630 enpresak aurkeztu dute enplegua erregulatzeko txostenen bat. Confebaskek asteazken honetan bertan jakinarazi duenez, hiru probintzia horietako enpresen %45ek egin ditu enplegu erregulazioak, eta langile guztien laurdenei eragin diete.
Zerbitzuen sektorean nabaritu da eraginik handiena: enplegua aldi batez murrizteko eskariak aurkeztu dituzten enpresa guztien %80 baino gehiago dira sektore horretakoak. Nafarroan, eraikuntza sektorekoak dira aldi baterako erregulazioen %10,6; Araban, Bizkaian eta Gipuzkoan, berriz, industria alorrekoak dira enplegua erregulatu duten enpresa guztien %9 inguru, eta eraikuntzakoak %5 inguru.
