Koronabirusak eragindako osasun krisiak jarduna egokitzera behartu ditu eragile gehienak, eta baita Gure Esku erabakitzeko eskubidearen aldeko dinamika ere. Egoera horretan, Gure Esku-k Gelditu. Hausnartu. Erabaki izeneko solasaldi digitalen ziklo bat jarri du martxan. «Bizi dugun osasun krisiak salbuespenezko egoera batera eraman gaitu; gure gizartearen indarguneak eta ahuleziak muturrera eraman eta azalera ekarri ditu. Hamaika auzi zeuden mahai gainean krisi honen aurretik ere, baina ezin uka egoera honetan gai askok eta askok esanahi berezia hartu dutela», nabarmendu dute.
Internet bidezko solasaldiotan, bi edo hiru hizlari elkarren artean ariko dira hizketan, ordu erdiz, eta dagokien gaiari buruz egiten duten egoeraren analisia eta euren ustez behar diren aldaketak eta hartu beharreko erabakiak partekatuko dituzte. Gaur, kultura izan dute hizpide, Kultura: apustu egiteko garaia izenburupean. Horretarako, hiru gonbidatuk hartu dute hitza: Garbiñe Ubeda idazle eta Euskal Idazleen Elkarteko lehendakaria, Gotzon Barandiaran idazle eta kulturgilea, eta Hedoi Etxarte idazle eta Katakrak liburu dendako kidea.
Datozen egunetan egingo dituzten gainerako solasaldiak hauek dira:
Espazio publikoaren itxiera
Apirilaren 28an —19:00— *Euskaraz
Mario Zubiaga politologoa, EHUko ikertzaile, irakasle eta Gure Esku-ren Zuzendaritza Kontseiluko kidea eta Xabier Barandiaran soziologo, Deustuko Unibertsitateko irakasle eta Gipuzkoako Foru Aldundiko estrategia arduraduna.
Gobernantza ereduaren krisia
Apirilaren 30ean —19:00— *Gaztelaniaz
Jaume Lopez Pompeu Fabra Unibertsitateko Zientzia Politikoetako irakaslea eta Zelai Nikolas legelari eta Gure Esku-ren Zuzendaritza Kontseiluko kidea.
Elikadura eta kontsumoa: teoriatik praktikara
Maiatzaren 5ean —19:00— *Euskaraz
Gotzone Sestorain Zabaleta baserritar eta Etxalde sindikatuko eta Leitzako kontsumo taldeko kidea, eta Mirene Begiristain Zubillaga ekonomialari, EHUko ikertzaile eta irakasle, eta EH Kolektiboko eta OlatuKoop kooperatiba sareko kidea.
Sistemaren krisia
Maiatzaren 7an —19:00etan— *Gaztelaniaz
Amaia Perez Orozco ekonomialari eta aktibista feminista eta Jule Goikoetxea filosofo politiko, ikertzaile, irakasle eta aktibista feminista.
Elkarrizketak zuzenean ikusi ahalko dira, baita gerora ere, Gure Esku-ren Youtubeko kanalean.
Horrekin batera, Gure Esku-k komunitatearen babesa beharrezkotzat jo du aurrera egiteko: «Aurretik ere bagenekien, baina orain ere agerian geratu da gutako bakoitzak besteen beharra duela, inor ez dela independente, eta autosufizientzian oinarritutako gizarte ereduek ez dietela erantzuten herritar guztion beharrei». Erantsi dute bazkideak direla Gure Esku-ren sostengu ekonomiko bakarra, eta kanpaina berezi bat martxan jartzeko asmoa agertu dute, «komunitatearen babesa indartzeko asmoz».
Kaleko mobilizazioak, udazkenera
Era berean, Hamaika Gara dinamikaren sustatzaileetako bat da Gure Esku, eta egitasmo horren barruan mobilizazioak antolatu zituzten maiatz-ekainetarako. Horiek udazkenera atzeratu dituzte, osasun krisiak hala behartuta, baina gogorarazi dute martxoaren 11n abiatutako sinadura bilketa zabalik dagoela oraindik ere.
