Ez edateko, ez jana prestatzeko, ezta animaliei emateko ere. Txorrotako urik ez erabiltzeko esan die gaur Zaldibarko Udalak Eitzaga auzoko biztanleei.
Anboto aldizkariak azaldu duenez, osasun teknikariek eman diote aholkua udalari, gaur eguerdian. Haatik, Eusko Jaurlaritzak uraren egoerari buruzko txostena helarazi du goizean, eta, horren arabera, Zaldibarko, Ermuko eta Eibarko bizilagunek «segurtasun osoz» kontsumi dezakete iturriko ura. Hiriguneetan, sare publikoko ura jasotzen dute herritarrek, baina hainbat auzotan baserriek euren iturri propioak dituzte, eta horietan legoke arazoa.
«Zenbait ur-hartze pribatutan egindako neurketen ostean agertu diren adierazle batzuengatik» egin dute gomendioa, Anboto aldizkarian idatzi dutenez. Eitzagako hainbat biztanlerekin hitz egin dute, eta, esan dietenez, baserri batzuetan «garbi» atera dira azterketak, baina beste batzuetan ez, Anboto-ko Ekaitz Herrerak azaldu duenaren arabera. Gaineratu duenez, Zaldibarko Sallabente auzora ere zabaldu dute urik ez erabiltzeko aholkua.
Neurria «badaezpadakoa» dela adierazi dute teknikariek. Gaur, 19:00etan, Eitzagako bizilagunekin bilduko dira, azalpenak emateko.
