Euskal Herriko gehiengo sindikalak grebara deitzen duenean, Gipuzkoan izan ohi du arrakastarik handiena, eta oraingoan ere hala izan da, baina oso irudi ezberdinak utzi ditu eskualdeen eta sektoreen arabera. Industria alorreko enpresa handietan nabaritu da gehien, baita hiriguneetatik kanpoko merkataritza gune handietan ere. Tailer eta saltoki txikietan, aldiz, ez du horrenbesteko oihartzunik izan, herrien arabera: batzuetan, dendak eta kaleak ere hutsik egon dira; beste batzuetan, ohi baino mugimendu txikiagoa egon arren, normaltasunez zabaldu dituzte ateak.
Grebak Goierrin eta Tolosaldean izan du eragin handiena. Industria ia erabat gelditu da, eta eskualde horietako herrietako denda eta taberna gehienak itxita egon dira. Goierriko lantoki handienen artean hauek egin dute bat: CAF, Indar, Irizar, Ampo, Jaso, Bellota eta GKN-k, besteak beste. Ikastetxe gehienek eta udal batzuek ere ez zuten zerbitzurik eman.
Tolosaldean, ia erabatekoa izan da greba, sektore guztietan. Tolosaldeko industrialde handienean, Apattaerrekan, lantegi gehien-gehienetan egin dute bat; salbuespenen artean dago Voith. Eskualdeko 102 langile batzordek babestu dute greba. Saltoki handi eta txikietan ere ia denek itxi dituzte ateak.
Debagoienean ere erantzun zabala izan du deialdiak, bereziki industrian, merkataritzan eta hezkuntzan. Kooperatiben artean ez da erabatekoa izan: bat egin dute Ulma Contructionek eta Ulma Packagingek, Orklik eta Cikautxok, beteak beste. Ez dute babestu Ulma Forjak, Ulma Architectural Solutionek eta Fagor taldeko hainbatek.
Osasun zerbitzuetan eragin eskasa izan du grebak eskualde horretan. Saltoki handietan, aldiz, handia. Mondragon Unibertsitatean bertan behera utzi dituzte eskolak, baina fakultate guztietako irakasleek ez dute grebarekin bat egin. Erakunde publiko batzuek babestu dute: Bergara eta Arrasateko udalek, adibidez. Gorabeheren artean, piketeek 06:00 aldera Kanpazarreko mendatea itxi dute une batez. Asteazken gauean eraso egin zioten kutxazain bati Arrasaten; Aretxabaletako bati ere egin diote kalte.
Desberdintasunak eskualdeen artean
Lurraldeko argazkia errepikatu egin da Debabarrenean, Urola Kostan, Oiartzualdean eta Behe Bidasoan: greba nabariagoa izan da lantegi eta saltoki handietan, baina ez denetan. Herrietako denda eta ostatuetan ere alde handiak egon dira eskualde batzuen eta besteen artean: Oiartzualdean eta Urola Kostan beste bietan baino gehiago antzeman da.
Pasaiako portuan, berriz, kamioien sartu-irtenean ez da alde handirik nabaritu; bai, ordea, barruko eraikinetan: ia erabatekoa izan da greba. Guardia Zibilak zaindu ditu porturako sarrerak. Garraio publikoetan gutxieneko zerbitzuek normaltasun osoz funtzionatu dute lurraldean. LABeko eta Aitzina gazte antolakundeko hainbat kidek bi orduz eten dute —07:30etik, 09:30era— Lapurdi eta Gipuzkoa lotzen dituen Euskotren linea. Era berean, arratsaldean grebalari batzuek A-15 errepidea itxi dute Hernani eta Andoain artean, eta auto ilara luzeak sortu dira.
Donostian, oso irudi ezberdinak izan dira, auzoen arabera: Egian eta Amara zaharrean nabaritu dira gehien lanuzteak. 27. Industrialdean manifestazio bat egin dute lehen orduetan, eta enpresa gehienek itxi dituzte ateak. Goizak aurrera egin ahala, handituz joan da jarduera. Gorabeheren artean, Ertzaintzak bi pikete atxilotu ditu goizaldean, bi kutxazaini eraso egitea eta hainbat dendaren kanpoaldean grebaren aldeko pintaketak egitea leporatuta; aske geratu dira, karguekin.
