Ia bi urteren ondoren, 11:30 aldean espetxetik atera dira Altsasuko auzian auzipetutako zazpi gazteetatik bi: Iñaki Abad eta Aratz Urrizola. Kanpoan senitartekoak eta lagunak zituzten zain; 35 pertsona inguru, EITBren arabera. Zaballako espetxeak (Araba) aste honetan bertan adierazi du biak egunero atera ahal izango direla kartzelatik lana egiteko edo formatzeko, eta gaua barruan pasatu beharko dutela atzera; asteburuak kanpoan igaroko dituzte. Abadi hiru urte eta erdiko kondena jarri zioten; Urrizolari, lau urte eta bi hilabetekoa. Zigorraren laurdena betea dute. Beste bost gazteak zazpi urte eta erdi eta bederatzi urte eta erdi arteko zigorrak betetzen ari dira.
Hirugarren gradura aldatzeko, Zaballako espetxeko balorazio batzordeak ebatzi du bi gazteek bizitza arrunta egin dezaketela, eta euren zereginekin jarraituko dutela, lanean nahiz ikasten.
Iñaki Abaden aitak espetxeko sarreran adierazi du «poz handia» eta «tristura handia» sentitu dituztela aldi berean, «oso tristea» baita haientzat gainontzeko gazteak kartzelan egotea. Esan du beren nahia dela espetxean dauden guztiek baimenak lortzea lehenbailehen, gertatutako guztia «injustizia izugarria» delako.
Adur Ramirez de Alda da espetxean jarraituko duten gazteetako bat. Antton Ramirez de Alda aitak asteazkenean BERRIAri adierazi zion oraindik ez zutela idatziz jaso Abaden eta Urrizolaren gradu aldaketa, eta ez zekitela nolakoak izango diren haien baldintzak; «zuhurtasunez» jaso zuten berria: «Pozten gara, baina pena ere badugu beste bost gazteek kartzelan jarraitzen dutelako». Nabarmendu zuen oraindik ere injustizia egoera batean daudela, eta zazpiak aske geratzea nahi duela.