1978ko sanferminetako biktimen omenez, Gogoan eskulturaren plaka berria inauguratu dute gaur, Iruñean, azkeneko asteetan hiru eraso izan ondoren —lapurreta, hausturak...—. Sanfermines 78 gogoan elkarteak antolatu du ekitaldia, eta jende asko azaldu da. Oraingoan plaka hormigoi eta harrizko oinarri baten gainean dago finkatua. Nafarroako Gobernuak jarri du, erkidegoko "memoriagune" izendapena baitu eskulturak.
Ekitaldian, aurresku bat dantzatu ondoren, agiri bat irakurri du elkarteak. Joaldunak, fanfarre bat, txistulariak eta abeslari bat ere izan dira. Ordezkari publikoen artean egon dira, besteak beste, Unai Hualde Nafarroako Parlamentuko presidentea eta Joseba Asiron Iruñeko alkate ohi eta egungo zinegotzia.
