Jeltzaleen onerako litzateke Eusko Legebiltzarrerako bozak gaur bertan egitea, izan ere, Euskobarometroaren arabera, bi eserleku gehiago, 30 eta botoen %40 lortuko lituzkete. Horrez gain, parlamentuan gehiengo osoa eskuratu ahalko lukete bai sozialistekin eta baita EH Bildurekin koalizio gobernu bat osatuta.
EAJ ez ezik, PSE-EEk ere egun baino bost legebiltzarkide gehiago eta botoen %18 lortuko lituzke. Hala, jeltzale eta sozialisten arteko koalizio gobernua bera ere indartuta aterako litzateke, eta gehiengo absolutua gaindituko luke. Dena den, Parlamentuko bigarren indarra izaten jarraituko luke EH Bilduk egun baino eserleku bat gehiagorekin —hemeretzi izango lituzke—, eta botoen %23rekin.
Maiatzaren 28a eta ekainaren 19a bitartean egin du inkesta EHUko Zientzia Politikoetarako Departamenduak. Haren arabera, Elkarekin Podemos eta PPren kalterako litzateke bozak orain egitea. Izan ere, 11 legebiltzarkide izatetik sei izatera igaroko litzateke lehena, botoen %9,6 eskuratuta, eta hiru legebiltzarkide galduko lituzke Alderdi Popularrak. Ciudadanos eta Vox, berriz, Parlamentutik kanpo geratuko lirateke.
Parte hartzeari dagokionez %65 inguruko litzateke, eta nabarmentzekoa da galdekatutako 1.200 pertsonen artean gehienek —%80 inguru— argi dutela nori eman botoa, eta soilik %15 inguru liratekeela zalantzan leudekeen hautesleak.
