2015eko hauteskundeek "egoera konplexua" ekarri zuten Nafarroako Parlamentura, baina, "zatiketa" baino gehiago, Nafarroaren "pluraltasuna" ikusi du Uxue Barkos lehendakariak azken legealdiko parlamentuaren osaeran. "Ez daukat dudarik maiatzean hautetsontziek utziko duten hurrengo parlamentuak ere gure komunitatearen aniztasun hori islatuko duela". Hala adierazi du gaur Barkosek, maiatzaren 26ko foru hauteskundeetarako dekretua sinatu berritan.
Nafarroako Jauregian egin dute ekitaldi instituzionala, gaur goizean. Barkos ez ezik, bertan izan dira, besteak beste, Nafarroako Parlamentuko presidente Ainhoa Aznarez eta Manu Aierdi eta Miguel Laparra gobernuko lehendakariordeak ere. 2019a urte "gakoa" izango dela nabarmendu du Barkosek: "Nafarroako hiritarrek hilabeteko epean aukeratuko dituzte ordezkariak, instituzio guztietan".
Horrenbestez, martxan da Nafarroako Parlamentarako ordezkariak aukeratzeko prozesua. Maiatzaren 10ean hasiko da kanpaina ofiziala, eta, behin bozak egin ondoren, ekainaren 19an egingo dute parlamentua osatzeko bilkura.
