Nekane Txapartegi asteasuarra (Gipuzkoa) irailean geratu zen aske. Espainiako Auzitegi Nazionalak preskribatutzat eman zuen hari egotzitako delitua, eta, horrenbestez, bertan behera gelditu zen haren kontra Espainiak egin eta Suitzak onartutako estradizio eskaria. Iazko apiriletik zegoen Txapartegi behin-behinean preso, Zurichen (Suitza).
Orain, Justizia Auzitegi Federalak jakinarazi du asilo eskaerak ez duela funtsik, ez baitago haren aurkako estradizio eskaerarik. "Europako gainerako herritarren gisara, Txapartegi andrea Suitzan egon daiteke zirkulazio askearen arauen arabera", Migrazioetarako Estatu Idazkaritzako bozeramaile baten esanetan.
18/98 sumarioan epaitu eta zigortu zuten Txapartegi (2009), eta sei urte eta bederatzi hilabeteko zigorra ezarri zion Espainiako Auzitegi Nazionalak, «ETArekin kolaboratzeagatik». Espetxeratu aurretik egin zuen ihes, ordea, eta iazko apirilean atxilotu zuten Suitzan.
