Kartzela zigorrari epemuga jartzea. Hori da Jakes Esnal eta Frederic Haranburu Xixtor euskal presoen zigor-kommutazio eskaeraren helburua. ETAren Argala komandoko kideak bizi osoko kartzela zigorrera kondenatu zituzten 90eko hamarkada erdian, eta, beraz, beren zigorrak ez du bukaera datarik. François Hollande Frantziako presidenteak zigor kommutazioa onartuko balu gehienez ere sei urtera kanpoan egon litezkeela azaldu du Maritxu Paulus Basurko bi presoen abokatuak.
Ipar Euskal Herriko pertsona ezagunak elkartu dira gaur goizean, Baionan eskaini duten prentsaurrekoan, Esnal eta Haranbururen egoera salatu eta beren zigorrari epemuga eman diezaiotela eskatzeko. Horien artean ziren Battitta Salaberri Hendaiako auzapez ohia, Paul Badiola Donibane Lohizunekoa eta Andde Darraidou Ezpeletakoa, Sylviane Allaux PSko diputatua eta Emilie Dutoya (PS), Alice Leizagezahar (EELV) eta Sophie Buissiere (EELV) Akitania Berriko kontseilariak. Azaldu dutenez, beren ordezkaritza bat Eric Morvan Pirinio Atlantikoetako prefetarekin elkartu zen orain dela egun batzuk, eta, beren bidez, gutuna helarazi diote Frantziako presidenteari —prentsaurrekoan agertu direnez gain, hautetsi, abokatu eta bestelako pertsona andanak babestu du eskaera—. Gutun bera Frantziako lehen ministroaren, Justizia ministroaren eta Barne ministroaren kabineteburuei ere helarazi diete.
"Aieteko Bake Konferentziatik bi arazo nagusi konpondu behar dira, armena eta pertsonena", azaldu du Salaberrik. Armagabetzea apirilaren 8rako gauzatua izanen da, eta espero dute presoena ere konponbidearen bidean jartzea. "Armak isildu dira, baina gobernuek ez dute erantzun baikorrik eman. Armagabetzearentzat bezala, presoen gaian ere gizarte zibila engaiatu behar da".
Zigor kommutazioa
Maritxu Paulus Basurko abokatuak esplikatu du zertan datzan zigor kommutazioa. "Esnal eta Haranburu bizi osorako kartzela zigorrera kondenatu zituzten, 18 urteko segurtasun zigorrarekin. Espainiako orduko kode penalaren arabera, 30 urteko kondena izanen zuten". Bi euskal presoen kondena 30 urtera mugatzea eskatu dute, beraz. Frantziako presidenteak eskaera onartuko balu, berriz epaitegietara itzuliko litzateke kasua. "Gaizkile taldeko kide izateagatik beste hamar urteko kondena dute; magistratuek erabaki beharko dute 30 ala 40 urteko epea atxiki. Horren arabera, zigor murrizketak aplikatuko lirateke". Gehienez ere, beste sei urte izanen lituzkete presondegian betetzekoak.
