Indarrean da Herritarren Segurtasun Legea edo Mozal Legea. Lege hau zein zigor kode berriari buruz kritiko agertu ziren NBEren bost kontalari, "funtsezko eskubideak" urratu zitzazkeelako. AIk ere salatu zuen Herritarren Segurtasun Legeak "giza eskubideen oinarrizko bermeak" urritzen dituela.
Mozal legearen kontrako helegiteak jarri zituzten Konstituzionalean Espainiako Kongresuko oposizioko zenbait taldek. PSOE buru zela, Izquierda Plural, UPD, Coalicion Canaria eta Compromis-Equo taldeek jarri zuten helegitea. Errekurtsoa jarrita, PPk urte hasieran onartutako lege horrek Espainiako Konstituzioa urratzen duela salatu nahi izan zuten, eta, bereziki, herritarren oinarrizko zenbait eskubide "babesik gabe" uzten dituela.
Amaiurrek, EAJk eta Geroa Baik ez zuten bat egin ekinbidearekin, PSOEren jarrerak sinesgarritasunik ez zuela salatuta.
PPren gehiengo osoa baliatuta onartu zen legea martxoan. Oposizioko alderdi guztiek berretsi dute lege aldaketak baliogabetzeko asmoa, alderdi popularrak gehiengoa galtzen duenean.
