m24 - Udal eta foru hauteskundeak

Jose Javier Esparza UPNren hautagaiak Agoitzen eman du botoa. Nafarroan, UPNk lortuko dituen emaitzen zain daude guztiak. Duela lau urte, 19 eserleku eskuratu zituen UPNk, Yolanda Barcina buru zela. Inkestek, ordea, jaitsiera iragartzen diote oraingoan.

Azken lau urteetan Bilduren esku egon da Gipuzkoako Foru Aldundia. Koalizioak 22 eserleku lortu zituen 2011ko hauteskundeetan, EAJk 14, PSE-EEk 10, PPk 4 eta Aralarrek 1.

Xabier Olano EH Bilduren Gipuzkoako ahaldungai nagusiak eman du botoa, Altzon. Atzo argitaratu zuen BERRIAk Jokin Sagarzazu kazetariak EH Bilduren hautagaiari egindako elkarrizketa: "Gipuzkoan ere aldaketa eta ilusioa gure eskutik datoz".

Markel Olano EAJren Gipuzkoako ahaldungai nagusiak eman du botoa, Beasainen. Atzo argitaratu zuen BERRIAk Jokin Sagarzazu kazetariak EAJren hautagaiari egindako elkarrizketa: "Egungo egoeran zilegi da bigarrenak agintea hartzea"

Javier Maroto PPren Gasteizko alkategaiak eman du botoa, eta gasteiztarrei eskatu die "Gasteiz ondoen defendatuko duenaren" alde egiteko. Gasteizko Udalerako oso lehia estua espero da PP, EH Bildu eta EAJren artean. Azken lau urteetan 9 eserlekurekin agindu du PPk, eta 6na ordezkari izan dituzte EAJk, PSE-EEk eta EH Bilduk.

Botoa eman dezaketen artean, erdia baino gehiago (%51,7) emakumeak dira. Nafarroako Gobernurako eta Arabako, Bizkaiko eta Gipuzkoako diputazioetarako zerrendaburuen ia hiru laurden, ordea, gizona da. Gurutze Izagirre kazetariak aste honetan argitaratu du erreportajea giaren inguruan: Ruanda urruti dago.

Hautagaiak ez ezik alderdietako buru gehienak ere goizean ematen dute botoa. Idoia Mendia PSE-EEren idazkari nagusiak botoa ematera deitu ditu herritarrak "askatasun osoz egiten ari diren lehen hauteskundeetan. Arabako, Bizkaiko eta Gipuzkoako PPren buru Arantza Quirogak Hondarribian (Gipuzkoa) eman du botoa, Sortuko presidente Hasier Arraizek Donostian, EAJko presidente Andoni Ortuzarrek Abanton (Bizkaia)...

Uxue Barkos Geroa Bai-ko hautagaiak ere eman du botoa, Iruñean. Nafarroan ikusmin handia sortu dute gaurko bozek. Batetik, ikusteko dago zenbateraionoko jaitsiera izango duen UPNk, eta bestetik, garrantzitsua izango da bigarren indarra zein izango den jakitea ere. Geroa Bai, EH Bildu eta Ahal Dugu-ren artean lehia estua iragarri dute inkestek.

Javier de Andres PPren ahaldungai nagusiak ere eman du botoa. Azken lau urteetan bera izan da Arabako ahaldun nagusi. Gaurko, ordea, PPk zenbait eserleku galduko dituztela iragarri dute inkestek. Duela lau urte, 16 eserleku eskuratu zituen PPk, 13 EAJk, 11 Bilduk, 9 PSE-EEk eta 2 EBk.