m24 - Udal eta foru hauteskundeak

Juan Mari Aburto EAJren Bilboko alkategaiak eman du botoa. Iñaki Azkuna hil osteko lehen udal hauteskundeak dira. Ikusteko dago EAJk Bizkaiko hiriburuan gehiengo nagusia lortuko duen. 2011ko udal hauteskundeetan nabarmen nagusitu zen; 15 eserleku lortu zituen, 6 PPk, 4 Bilduk eta 4 PSE-EEk.

Juan Karlos Izagirre EH Bilduren Donostiako alkategaiak ere eman du botoa Igeldoko eskolan. Gaur lehia estua espero da Donostian. 2011n, 8 eserleku lortu zituen EH Bilduk, 7 PSE-EEk, eta 6na EAJk eta PPk.

Iñigo Urkullu Eusko Jaurlaritzako lehendakariak eman du botoa Durangon (Bizkaia). Herritarrak parte hartzera deitu ditu lehendakariak, "erakunde sistema indartzeko". Ahal Dugu-ko Roberto Uriartek ere eman du botoa. Parte hartze "handia" espero du Uriartek, "benetako aldaketa" gerta dadin.

Nafarroan ikusmin handia sortu dute hauteskundeek, balizko aldaketa dela eta. 50 parlamentari aukeratuko dituzte boto emaileek eta 26 da zenbaki magikoa. Inkesta guztiek iragartzen dute 2011ko argazkia aldatu egingo dela. 2011n, 19 eserleku lortu zituen UPNk, 9 PSNk, 8 NaBaik, 7 EH Bilduk, 4 PPk eta 3 Ezkerrak.

Hautes mahaira joan ordez, gaurkoan boza postaz ematea erabaki dute 57.372 lagunek: 6.173k Araban, 23.438k Bizkaian, 15.600ek Gipuzkoan eta 12.161ek Nafarroan.

Hautagai nagusiek dagoeneko jakinarazi dute noiz emango duten botoa. Goiztiarrenak Unai Rementeria EAJren Bizkaiko ahaldungai nagusia, eta Juan Karlos Izagirre EH Bilduren Donostiako alkategaia izango dira. 09:30ean emango dute botoa. Ordu horretan joango da bozkatzera Iñigo Urkullu Eusko Jaurlaritzako lehendakaria. Gainontzekoek geroago emango dute botoa. Besteak beste, Javier Esparzak (UPN), Adolfo Araizek (EH Bildu), Uxue Barkosek (Geroa Bai) eta Juan Mari Aburtok (EAJ), 10:00etan; Javier Marotok (PP), Markel Olanok (EAJ), Eneko Goiak (EAJ) eta Kike Fernandez de Pinedok (EH Bildu), 10:30ean; Xabier Olanok (EH Bildu), 11:00etan....

Hautes mahaietan 10.644 lagunek egingo dute lana, eta bakoitzak 62,61 euroko ordaina jasoko du.

Ireki dituzte hautes mahaiak. 20:00ak arte eman ahal zango da botoa. Araban, guztira, 51 udalerri daude; 112 Bizkaian; 88 Gipuzkoan; eta 272 Nafarroan. Lehen hiru herrialdeetan, udalerri guztietan aurkeztu dira hautagaitza zerrendak. Nafarroan, aldiz, 249 udalerritan bakarrik, eta zerrendarik aurkeztu ez den 23 udalerrietan udazkenean egingo dituzte bozak.

Ordubete eskas barru zabalduko dituzte hautes mahaiak. Guztira, 3.548: Araban, 412 hautes mahai; Bizkaian, 1.323; Gipuzkoan, 847; eta 966 Nafarroan.