m24 - Udal eta foru hauteskundeak

"Kataluniako Parlamentuko gehiengo independentista argia da", esan du Junts pel Si-ren gaurko egoitzan Quico Homs kanpaina koordinatzaileetako batek. Martxelo Otamendik jakinarazi duenez, egoitza horretan TV3eko pantailan Unioren egoitzako irudiak ematen dituztenean oihuak entzuten dira.

Martxelo Otamendi #27S: Oihuak Juntseko egoitzan, TV3k Unió, PP eta Ciutatans alderdiekin konexioak egiten dituenean.

— Berria.eus (@berria) September 27, 2015

"Parte-hartze datuek erakusten dute gaurko bozen izaera plebiszitarioa", esan dute CUPeko ordezkariek egindako lehen balorazio azkar batean. Pozik daude, izan ere PPren aurretik egon litezke ezkerreko independentistak Kataluniako Parlamentuan. "CUP sendotu egin da ezker independentistaren, antikapitalistaren eta feministaren erraminta modura".

Kataluniako boz eta erreferendum guztietako parte hartzeak gainditu dituzte gaurkoek. Orain arte Kataluniako hauteskundeetan parte-hartzea sekula ez da izan %70etik gorakoa. Gaur %80tik gorakoa izan daiteke.

Nahiz eta JxSi eta CUP botoen %50era ez iritsi, posible da, eta agian, litekeena, bi horien artean independentziaren kontrakoek baino boto gehiago izatea. Izan ere, portzentaia horretan aintzat hartzen dira boto zuriak eta baliogabekoak. Ondorioz, botoen %49,8rekin independentziaren aldekoek kontrakoek baino boto gehiago izan ditzakete.

TV3en inkestaren arabera, Junts pel Si-k eta CUPek botoen %49,8 lituzkete.

Hasi dira lehen emaitzak iristen. Lehen 153 botoak dira. Zenbaketak aurrera egin ahala erakutsiko ditu BERRIAk emaitzak grafikoetan. TV3en arabera, independentziaren aldekoek irabazi dute.

TV3 Kataluniako Telebistak gaur egin duen zundaketaren arabera, independentistak gehiengoa lirateke Parlamentuan eserlekuetan eta botoetan. JxSi-ren eta CUPen artean gutxienez 74 eserleku izango lituzkete. Eserlekuetan irabazteaz gain, botoetan ere irabaziko lukete, gutxigatik bada ere.

TV3en zundaketaren berri izan eta berehala, Antonio Baños CUPeko hautagaiak sareratutako abestia:

https://t.co/K36fy2ddCs dedicat a l estat espanyol. Sense rancunies, adeu

— Antonio Baños (@antoniobanos_) September 27, 2015

Independentistek eserlekuetan gehiengoa izatea errazagoa ikusten zen. Botoetan, ordea, lehia estua egon daiteke. Martxelo Otamendi BERRIAko zuzendariak aipatu duen inkestaren arabera, ozta-ozta baina independentistek irabaziko lukete.

Martxelo Otamendi #27S: Independentziak (Junts eta CUP) botoen % 50,50 inkestaren arabera

— Berria.eus (@berria) September 27, 2015