Fernando Grande-Marlaska Espainiako Gobernuko Barne ministroak ukatu egin du sakabanaketa espetxe politika bat dela, eta zehaztu du bere garaian «terrorismoaren aurkako neurri» gisa ezarri zutela. Horiek hala, egun ETA deseginik, Espainiako Auzitegi Nazionaleko epaile izandakoak ez dio zentzurik ikusten hura erabiltzen jarraitzeari.

Epaile ohiak zehaztu du, hala ere, ez duela sinesten «inor bereizi gabeko neurrietan», eta legeak bete egin behar direla, betiere «biktimen elkarteekin elkarlanean». Arlo horretan, gogorarazi du bera agintean denetik bi preso soilik gerturatu dituztela Euskal Herrira, biak Langraiz bidea izenekoa betez, ETAtik banandu zirenak eta biktimei barkamena eskatu zietenak. Dena den, Marlaskaren hitzetan, egun presoak hurbiltzeko garaian, «espetxe politikak» dira bete beharrekoak.

Hain zuzen ere, joan den asteburuan Sarek iragarri zuen bilera bat eskatuko diola Espainiako Barne ministroari presoen auziaz hitz egiteko. Bilbon eta Baionan egindako manifestazioen ostean egindako agerraldian iragarri zuten erabakia. Espainiako Gobernuak euskal presoei ezartzen dizkien salbuespen neurriak amaitu ditzala galdegin nahi diote ministroari. Atzo Marlaskak esandakoak «positiboak» direla esan zuen Sarek, baina «errealitate bihurtu» behar direla.