Joana Mortagua Bloco de Esquerda taldeko parlamentariak aurkeztu du mozioa: "Bake prozesu bat eraikitzea beti da konplexua, luzea, gehiegitan mingarria, baina guztietan dago garai bat ezinbestekoa, eta hori da desarmatzea". Mortaguak gogorarazi duenez, "50 urteko borroka armatuaren ondoren, eta ETAk behin betiko su-etena iragarri eta bost urtera, aro erabakigarria abiatzeko aukera" dago Euskal Herrian.

Gogorarazi duenez, desarmatzea "egiaztatua, baldintzarik gabea eta alde bakarrekoa" da, eta uste du "albiste ona" dela "Europa baketsu eta seguru bat nahi dutenentzat". Halaber, gaineratu duenez, "hori aitortzeak ez du ETAren jarduna "zuritzea" esan nahi.

"Zauria mendekuagatik zabalik mantentzea arduragabekeria" litzatekeela uste du, eta mozioaren aldeko botoa eskatu du "Euskal Herriarekiko elkartasun boto" gisa. PS, BE, PCP, PEV eta PAN taldeen aldeko botoekin, legebiltzarrak onartu egin du adierazpena. Kontra bozkatu dute, berriz, PSD eta CDS-PPk.