ETBk argitaratu ditu bileraren irudiak. Horietan ikus daitekeenez, Iñigo Urkullu Eusko Jaurlaritzako lehendakaria, Uxue Barkos Nafarroako Gobernuko lehendakaria eta Jean Rene Etxegarai Euskal Elkargoko presidentea batzartu ziren Ram Manikkalingam Nazioarteko Egiaztatze Batzordeko buruarekin.

Nafarroako Gobernuak jakinarazi duenez, bilkuraren helburua izan zen egoeraren eta ETAren desarmatzerako berehalako pausoen analisia partekatzea. Bilera horretan, hiru erakundeek esker ona adierazi zioten Nazioarteko Egiaztatze Batzordeari egindako lanagatik.

20:00etan egin zuten bilera asteazkenean, Arkautin (Araba), Neiker-Tecnalia zentroan. Bileran izan ziren Jonan Fernandez Eusko Jaurlaritzako Bake eta Bizikidetza idazkaria, Alvaro Baraibar Nafarroako Gobernuko Bake eta Bizikidetza zuzendaria eta Marc Amestoi Etxegarairen kabinete burua ere.