Espainiako jarduneko Barne ministro Jorge Fernandez Diazek azaldu duenez, Frantziako Poliziak gaur eman dio ofizialki topatutako armen berri: 145 arma zeuden Oiseko departamenduko Carlepont herrian topatutako arma biltegian; 75 errebolber eta 70 pistola automatiko. Horiez gain, munizioa, ehizarako bi fusil eta bestelako elementuak atzeman dituzte.

Fernandez Diazek zehaztu duenez, "adierazgarria" da pistolak Smith and Wesson markakoak direla eta horrek pentsarazten duela 2006an Vauverten lapurtutako armak direla. 196 errebolber eta 145 pistola lapurtu zituzten orduan, Fernandez Diazek azaldu duenez. Jarduneko ministroak nabarmendu du ETAren aurkako "kolpe garrantzitsua" dela, "kontuan izanik ETAk izan dezakeen armategia bizpahiru tona lehergailu, munizioa eta 200 eta 300 arma ingurukoa" dela.

ETAri "desegitea publiko egitea" besterik ez zaiola geratzen esan du Fernandez Diazek, eta erantsi hala eginez gero espetxe politika bestelakoa izan litekeela.