«Gorrotoa sustatzen eta bultzatzen duten ordezkari publikoen adierazpen politiko oro» gaitzesten du Nafarroako Parlamentuak. Hori da PSNren, EH Bilduren, Geroa Bairen eta Zurekin-en aldeko botoekin eta UPNren, PPNren eta Voxen aurkakoarekin parlamentuak gaur onartu duen ebazpenaren muina. Gaitzespen horren atzean denetariko oinarria izan dezaketen gorroto mezuak aipatu dituzte: «Jaioterria, arraza edo etnia jatorria, sexua, erlijioa, sinesmena edo iritzia, adina, desgaitasuna, sexu orientazioa edo identitatea nahiz beste edozein baldintza edo inguruabar pertsonal edo sozial».
Ebazpenaren bitartez, Nafarroako Parlamentuaren gehiengoak «gogorarazi» du ordezkari publikoen «funtsezko» egitekoa dela, batetik, «bizikidetza eta errespetua sustatzea», eta, bestetik, «gorrotoa piztearen aurka borrokatzea».
«Europa zeharkatzen duen gorroto tsunamia eskuin muturreko alderdi populisten gorakadaren ondorioa da», PSNren ustez. Alderdi horrek proposatu du ebazpena.