AUZIPETUAK

Hogei pertsona atxilotzeko agindua eman du Maria Servinik, Argentinan frankismoko krimenen aurkako kereila hartu duen epaileak. Hona hemen auzipetuen zerrenda eta bakoitzari leporatu dizkion delituak:

Rodolfo Martin Villa. Sindikatuen Harremanetako ministro izandakoa. 1976ko martxoaren 3an Gasteizen langileen aurka izandako errepresioaren erantzukizuna egotzi dio.

Alfonso Osorio Garcia. Presidentetza ministro izandakoa. 1976ko martxoaren 3ko Gasteizko hilketen erantzukizuna egotzi dio.

Jesus Quintana Saracibar. Gasteizko poliziaburu izandakoa. 1976ko martxoaren 3ko hilketetan San Frantzisko Asiskoa elizan gertatuaren erantzukizuna egotzi dio.

Antonio Carro Martinez. Presidentetza ministro izandakoa. 1975ean Juan Paredes Manot Txiki eta Angel Otaegi Etxeberria fusilatuta hiltzeko zigorra baliozkotzea egotzi dio, baita 1974an Salvador Puig Antichen heriotza kondena baliozkotzea ere.

Jose Maria Sanchez-Ventura Pascual. Justizia ministro izandakoa. 1975ean Txiki eta Otaegiren heriotza zigorrak sinatzea egotzi dio.

Fernando Suarez Gonzalez. Gobernuko hirugarren presidenteorde izandakoa. 1975ean Txiki eta Otaegiren heriotza zigorrak baliozkotzea egotzi dio.

Jesus Cejas Mohedano. Armadako talde juridikoko kapitain izandakoa. 1975ean Txiki eta Otaegi epaitu zituen gerra kontseiluan parte hartzea eta heriotza zigorrak baliozkotzea egotzi dio.

Felix Criado Sanz. Bilboko poliziaburu izandakoa. Jon Etxabek salatutako torturetan —1969an Zamorako kartzelan— parte hartzea egotzi dio.

Antonio Troncoso de Castro. Armadako talde juridikoko koronel izandakoa. 1970ean Burgosko prozesuko gerra kontseiluan —eta beste askotan— parte hartzea egotzi dio.

Jose Utrera Molina. Falangeko idazkari nagusi gisa Ministroen Kontseiluko kide izandakoa —orain gutxi arte Justizia ministro izandako Alberto Ruiz Gallardonen aitaginarreba izateagatik nabarmendu da egunotan—. 1974an Salvador Puig Antichen heriotza zigorra baliozkotzea egotzi dio.

Carlos Rey Gonzalez. Armadako talde juridikoko kapitain izandakoa. 1974an Salvador Puig Antich epaitu zuen gerra kontseiluan parte hartzea egotzi dio.

Licino de la Fuente. Lan ministro izandakoa. Puig Antichen heriotza zigorra baliozkotzea egotzi dio.

Antonio Barrera de Irimo. Gobernuko presidenteorde izandakoa —Deustuko Unibertsitateko irakasle ere jardun zen—. Puig Antichen heriotza zigorra baliozkotzea egotzi dio.

Benjamin Solsona Cortes. Polizia izandakoa. 1971n torturetan parte hartzea egotzi dio.

Jesus Gonzalez Reglero. Polizia izandakoa —jardunean da oraindik—. 1975ean torturetan parte hartzea egotzi dio.

Ricardo Algar Barron. Polizia izandakoa. Torturetan parte hartzea egotzi dio.

Pascual Honrado de la Fuente. Polizia izandakoa. Torturetan parte hartzea egotzi dio.

Jesus Martinez Torres. Polizia izandakoa. Torturetan parte hartzea egotzi dio.

Atilano del Valle Oter. Polizia izana. 1971n atxilotu bat tirokatzea eta leihotik botatzea egotzi dio.

Abelardo Garcia Balaguer. Ginekologoa izandakoa. 1967an haur jaioberri baten lapurretan parte hartzea egotzi dio.