THE UMBRELLAS
'Fairweather Friend'
Diskoetxea: Tough Love.
AEBetako San Frantzisko hiriko pop taldearen bigarren lan luzea da Fairweather Friend, eta, 2021eko estreinako lan homonimoarekin alderatuz gero, lehen ahalegin hartan agerikoegiak ziren influentziak —tartean, Beat Happening, The Pastels, Orange Juice edo Comet Gain— oraingoan apur bat lausotu dira, nortasun propioagoa erakusteko asmoz. Hala, gitarra dirdiratsuek leku egin diete tarte distortsionatuei, nahiz eta melodiak bere horretan mantentzen diren, batez ere Morgan Stanleyk abesten duenean; esaterako, Echoes ederrean. Unerik zaratatsuena, berriz, Toe The Line punk-rock harribitxia izan daiteke. Disko orekatsua eta gozagarria da pop melodien zaleentzat.