Errumaniako eta Eslovakiako selekzioek pronostiko guztiak hautsi dituzte, Eurokopako E multzoan garaipena lortuta hasieratik. Errumaniak aise irabazi dio Ukrainari (3-0), eta Eslovakiak mendean hartu du multzoko faboritoa, Belgika (0-1).
Lehen partidan, ukrainarrak nagusitasunez aritu dira, baina ezin izan dute baloi jabetza baliatu lehen zatian gola sartzeko aukera garbiak izateko. Errumania, aldiz, ez da kikildu faboritoaren aurrean, eta baloia lapurtzen zuen aldiro aurrera egin du golaren bila.
Errumaniako selekzioa konfiantza handiagoz aritu da minutuek aurrera egin ahala. Defentsako lerroa aurreratu du Ukrainaren baloi irteera oztopatzeko, eta horrela iritsi da lehen gola. Ukrainak huts egin du baloi irteeran, eta Stanciu kapitainak sekulako gola sartu du area ertzetik.
Bigarren zatian, Errumaniak ez du atzera egin, eta bost minutu eskasean bi aldiz zulatu du Luninen atea. Lehena Marinek sartu du, 53. minutuan, kontraeraso azkar batean, eta berriro area ertzetik egindako jaurtiketa batekin. Bost minutura Dragusek sartu du azken gola, korner batean.
Ukrainak aurrerapausoa eman du, baina berandu zen dagoeneko. Errumaniak lehen garaipena lortu du 2000. urtetik Eurokopan. Ukrainak, zeina aurreko aldian final-laurdenetara iritsi zen, gauzak asko zaildu dizkion emaitza bati buelta eman beharko dio hurrengo bi partidetan.
Belgikak zanpatekoa hartu du
Hasierako ikuskizunaren atzetik, Belgika iritsi da. Domenico Tedesco entrenatzaile berriarekin, Eurokopa irabazteko hautagai moduan iritsi dira belgikarrak, baina zanpatekoa hartu du multzoko ustezko talderik apalenaren aurka. Eslovakiak ez ditu izar asko bere hamaikakoan, baina adorez beteriko jokalariak direla erakutsi dute gaur.
Zazpigarren minutuan aurreratu da Eslovakia, eta partida osoan emaitzari eusteko gai izan dira. Doku belgikarrak akats larria egin du baloi irteeran, eta Schranzek aprobetxatu egin du, Bozenik taldekideari gol aukera garbia uzteko. Baina atezainak aldaratzea lortu du, eta Schranzek berak lortu du baloia zutoinen artean sartzea.
Ondorengo minutu guztietan behin eta berriz saiatu da Belgika markagailua iraultzen, baina Eslovakia eroso aritu da defentsa lanetan. Aukerarik argiena bigarren zatiaren hasieran izan du Belgikak, korner batean Lukakuk gola sartu baitu. Baina jokoz kanpo zegoen, gutxigatik, eta gola baliogabetu egin dute. Partida amaitzear zela, berriro gola sartu du Lukakuk, baina epaileak jokaldia berrikusi du, eta gola baliogabetu du, aurretik baloia eskuarekin jotzeagatik.
Multzo erosoa aurreikusten zen Belgikarentzat, baina bai porrot honek eta bai Ukrainarenak hankaz gora jarri dute E multzoa.
