Abotsanitzek alkatetza eskuratu zuenetik bigarren jaiak izango dira aurtengoak, eta lehenengoak EH Bildu gobernukide denetik. Iaz lehenengo keinuak egin zituzten (udalak lehen aldiz egin zion harrera ofiziala Jaizkibel konpainiari), eta aurten, «udalak irailak 8ko eguna antolatzeko duen legitimitatea ikustarazteko» pauso berriak eman ditu: lehen aldiz konpainia gisa aitortu eta alardeari dagozkion espazioak hartzea ahalbidetu dio Jaizkibeli. «Atzera bueltarik gabeko pausoak alarde publiko, parekide eta bakarrerantz. Urratsez urrats berdintasunerantz».
Zentzu horretan, bilkideek jakinarazi dutenez, irailaren 8an «normalizaziorako eta berdintasunerako bidean ematen ari diren aldaketak» babesteko, udal taldeko zinegotziek elizako eskaileretan egingo diote harrera ofiziala Jaizkibel konpainiari, iaz egin bezala. Ez ordea HAOSek antolatutako alarde pribatuari. Hori egitea «matxismoa zuritzea» litzatekeelako.
