Udaltzaingoak 28 urteko gizon bat atxilotu zuen Donostian larunbatean, beste gizon bat autoarekin harrapatu eta ihes egitea leporatuta. Gaur bertan hil da larunbatean harrapatu zuen 35 urteko gizona.
Udalaren arabera, bi gidariek aurretik eztabaida izan zuten Martuteneko biribilgunea eta Zorroagako tunela lotzen dituen errepidean, 19:30 aldera, larunbatean bertan. Tuneletik ehun bat metrora gelditu zituzten euren autoak; ondoren, batak bestearen ibilgailua jo zuen. Haietako bat, baina, autotik jaitsi, eta bestearen autoaren aurrean jarri zen, hark ez zezan ihes egin. Bada, autoan zegoenak aurrera egin zuen, 35 urteko gizona harrapatu, eta ihes egin zuen.
Jarraian atxilotu zuten 28 urteko gizona, Amara Berri auzoan. Atzo izan zuen epaiketa, eta epaileak aske utzi zuen, kargupean. Gaur jakin da hil egin dela hark harrapatu zuen gizona.