Musika urbanoaren zaleak gustura izango dira oraingoan: gaur Egurhotza festibal urbanoarekin gozatzeko aukera izango da Arrasateko Monterron parkean. Festibal berri hori Mondra & Roll jaialdiaren antolatzaileek antolatu dute, rock jaialdiaren bezperarako. Beraz, bihar eta etzi punk-oi! eta rock musika entzuteko aukera izango da Mondra & Rollen eskutik.
Aurtengoa Mondra & Roll jaialdiaren hirugarren aldia izango da, eta Europa hegoaldeko hardcore punk jaialdi garrantzitsuenetako bat bilakatu da jada. Lehen aldian, jaialdia soilik antolatu zuten. Iaz, jaialdiaz gain, Manu Chaoren kontzertua ere eman zuten. Aurtengoan, ordea, beste pauso bat ematea erabaki dute, beste jaialdi bat antolatuta: Egurhotza.
Jaialdiaren antolatzaileak Gasteizko Jimmy Jazz aretoa, Arrasateko Mauka Musikagintza eta Kataluniako HFMN Crew dira, Arrasateko Udalaren laguntzarekin.
Mondra & Roll jaialdirako bi eguneko bonuak 72,50 euro balio du. Egun bakarrerako bonua erosteko aukera ere izango da: 35 euro ostiraleko sarrerak eta 45 euro larunbatekoak.
Musikariak
Mondra & Roll jaialdiari dagokionez, bihar Sham 69, Madball, Roy Ellis, Brigade Loco, Kaleko Urdangak, Arene 6 eta Larru Beltzak entzuteko aukera izango da, eta larunbatean, berriz, Cock Sparrer, The Baboon Show, High Vis, Bad Nerves, The Chisel, Les Testadures eta Kontralde.
Jaialdi horretarako bi eguneko bonuak 72,50 euro balio du. Egun bakarrerako bonua erosteko aukera ere izango da: 35 euro ostiraleko sarrerak eta 45 euro larunbatekoak.
Egurhotza jaialdian, berriz, Mutiko (17:30), Etxepe (18:30), Ebano (19:30), J Martina (20:35), Judeline (21:50) eta Tata&Densok (23:05) emango dituzte kontzertuak.
Publikoak atseginez hartu du Egurhotza jaialdiaren proposamen berria. Ateak 17:00etan zabalduko dituzte, eta kontzertuak 17:30ean hasiko dira, eta gauerdira bitartean iraungo dute. Sarrerak aurrez edo egunean bertan erosteko aukera egongo da, 27,5 euroan eta 40 euroan, hurrenez hurren.
Uztailerako ekitaldi gehiago
Bi jaialdi horiek ez dira izango uztailean Arrasaten egingo dituzten kultur ekitaldi bakarrak; Udazabal izeneko udako kultur zikloaren barnean beste hainbat ekitaldi daude. Uztailaren 12an, datorren ostiralean, Femmm musika taldea entzuteko aukera izango da, eta uztailaren 18tik 21era Arrasate Blues jaialdia egingo dute —besteak beste, The Allnighters taldeak joko du—. Jarraian, hiru kaleko antzerkiz gozatzeko aukera izango da: Lanean jarraitu 75 urte arte, Troia eta Artiluso. Uztailaren 27an Ines Osinagak bere disko berria aurkeztuko du, eta hilaren 30ean, Ad Hoc Vakantieorkest orkestrak emango du kontzertua.
