Scolopax rusticola. 35 zentimetro luze da, eta haren hegoak, 60 zentimetro zabal. Moko fina eta luzea du, eta lumaje arre-gorrixka: mantxa ilunak ditu, kriptikoa da, eta modua ematen dio ingurunean kamuflatzeko. Hanka motzak eta begi ilunak ditu.
Testua: Oñatiko Natura Eskola
Non bizi da? Baso heze eta sarrien barnealdean bizi da. Eguna gordeta ematen du, orbel artean, eta ilunabarrean irteten da. Neguan, nekazaritza eremuetako zelai eta hezeguneetara hurbiltzen da elikatzeko.
Zer jaten du? Moko oso sentikorra du, eta lurrean sartuz, intsektuak, zizareak, miriapodoak, bareak eta barraskiloak aurkitu eta jaten ditu. Basoetako orbel artean ere aurkitzen du elikagaia.
Nola babesten du bere burua? Guztiz fio da lumajearen kamuflajeaz. Harrapariren bat hurbiltzean (ehiztariak, azeriak...), orbelean geldi geratzen da, horri esker ikusezina delakoan; azken orduan egiten du ihes. Gorra da; hortik datorkio izena: oilo gorra.
Nola ugaltzen da? Habia lurrean egiten du: sasi artean, iratze artean edo zuhaitzen kontra. Arrak hegaldi zirkularrak egiten ditu emearen inguruan, berarekin ugal dadin. Udaberrian bi eta bost arrautza artean erruten ditu, eta hiru astez berotzen ditu.
DATUAK
- Begiak buruaren bi alboetan dituenez, inguru guztia ikusteko gai da, 360 graduan. Harraparia badator, segituan ikusten du.
- Migratzailea da. Udazkenean iparraldetik etortzen da gurera, negua igarotzera. Ale batzuk Errusiatik!
- Ehiztarien artean oso preziatua da. Udazkenean, ehiza txakurren laguntzarekin ehizatzen dituzte.
