Europako liztorrik handiena da. Erregina 3,5 cm-koa izan daiteke; langilea, 2,5 cm ingurukoa. Erregina eta langileak, emeak, eztendunak dira; arrek ez dute eztenik. Begi oso handiak, buru gorrizta eta aurpegi horixka ditu. Hego eta hanka gorriztak ditu, eta sabelaldea horia, marra beltz finekin.
Testua: Oñatiko natur eskola
Non bizi da?
Erreginak negua zulo baten gordeta igarotzen du, hibernatzen. Udaberrian, habia egiteko zuhaitz-zulo edo aterperen baten, sei aldeko hamar gela inguru dituen paperezko habia txikia egiten du sabaitik eskegita, eta bakoitzaren horman arrautzatxo bana itsasten du.
Nola ugaltzen da?
Udazkenean errundako arrautzetatik arrak eta erregina berriak jaiotzen dira, eta ondoren erregina hil egiten da. Eztei hegaldia eginda, arrek emeak ernaltzen dituzte: ondoren, arrak hil egiten dira eta erregina zulo baten bila hasten da negua igarotzeko.
Zer jaten du?
Ehiztari gogorrak dira: euliak, erlamandoak, ezpatak, marisorginak eta abar ehizatzen dituzte; haragi zatitxoak ere lapurtzen dituzte ahal dutenean. Horiek zatitu, murtxikatu eta listuarekin nahastuta egindako bolatxoekin larbak elikatzen dituzte.
Antolaketa:
Arrautza bakoitzetik langile bana jaiotzen da. Hasierako langile horiek arduratzen dira habia handitzeaz, ondorengo larbak elikatzeaz eta ehizatzeaz. Hortik aurrera, erreginaren lana arrautzak jartzea da soilik, bere habiatik irten gabe.
DATUAK
- Zuhaitzen azala edota egur zaharra murtxikatuz eta listuarekin nahastuz, habia egiteko papera egiten du.
- Helduak soilik likidoz elikatzen dira: larbek ekoizten duten listu azukreduna, nektarra, landare-izerdia, eztia…
