Testua: Ana Galarraga
Duela milaka milioi urte, gizakia sortu aurretik… are gehiago!, tximinoak eta gaur egungo fauna sortu aurretik ere, animalia txundigarri batzuk bizi ziren Lurrean: dinosauroak.
Era askotako dinosauroak zeuden: txikiak eta handiak, haragijaleak eta belarjaleak, lur lehorrekoak eta urtarrak, ezkatak zituztenak eta lumak zituztenak. Gaur egun desagertuta dauden arren, badakigu existitu izan zirela. Nola? Ba zientzialariek haien hezurrak topatu dituztelako han eta hemen, baita arrautzak eta bestelako arrastoak ere; adibidez, kaka-mokordoak.
Arrasto horiei fosil deitzen zaie, harri bihurtuta daudelako. Eta batzuk, hain dira handiak eta bitxiak, kostatu egiten da halako animaliarik bizi izan zela ere imajinatzea. Ospetsuenetako bat Tyrannosaurus rex-a da, eta suhiltzaile-kamioi bat bezain handia zen. Velociraptor-a, berriz, askoz ere txikiagoa zen, baina oso azkar egiten zuen korrika. Eta Archaeopteryx dinosauroak lumak zituen eta hegan egiten zuen.
Asteroide batek Lurraren aurka jotzean sortu zen hondamendian desagertu ziren dinosauroak. Baina gaur egungo hegaztiak haietako batzuen ondorengoak dira. Bai, bai, oiloak eta txolarreak ere bai!
