Gerrari eta adiskidetasunari buruzko istorioa estreinatu du Markeliñe antzerki konpainiak: ‘Zepo Zapo’. 2000. urtean konpainiak sortutako ‘Mambru’ ikuskizunaren bertsio berrikusia da, eta horrekin ospatuko du bere 40. urteurrena.

Haur batek eskuetan liburu bat hartu orduko, diz-diz egiten diote begiek. Baina liburu hori ez da ausaz iristen, heldu batek ematen die bultzada. Heldu horiek trebatzeko sortu zuen Galtzagorri elkarteak ‘Behinola’ aldizkaria, duela 25 urte; 50. alea argitaratu dute abenduan.

Abenduaren 14an jantzi zuen Gipuzkoako Bertsolari Txapelketako txapela Alaia Martinek (Oiartzun, Gipuzkoa, 1987). Finalaren oroitzapen polita duela esan du, eta txapelari duen garrantzia ematen saiatuko dela: «Ez gehiago, ez gutxiago».

Argi kutsadurari buruzko CD-liburu berria argitaratu dute Katxiporretako pailazoek: ‘Zerua lapurtu dute!’. Emanaldi berriarekin ere hasi dira herriz herri, iazko liburua oinarri hartuta: ‘Ostirala iritsi da!’.

Abenduaren 5etik 8ra izango da aurtengo Durangoko Azoka. 933 nobedade hartuko ditu 58. azoka honek, ‘Hartzea ematea DA!’ lelopean. 274 erakusmahai izango dira Landako gunean, eta berrehun ekitaldi inguru antolatu dituzte.