Bata, Elise Zicler, tatuatzailea. Bestea, Bixente Perez, ile apaintzailea eta makillatzailea. Elkarrekin denda bat irekitzea deliberatu dute, eta «sortzaileentzako elkargune bat» izanen dela espero dute, «kolektiboki sortzeko leku bat» izan dezaten. Asteazkenean ireki zuten denda, Baionan, Maubec karrikaren 12. zenbakian, geltokiaren parean. Oraingoz, Zicler eta Perezekin batean beste tatuatzaile bat ariko da, eta ez dute baztertzen gero artisau gehiago aritzea.
Ile apaintzaile eta makillatzaile aritzeko ikasketak eginik, Bruselan egon zen Bixente Perez; duela pare bat urte itzuli zen Euskal Herrira, eta ile apaintzaile ibilitari gisa aritu da luzaz. Hilabeteotan Baionako Züzülü dendan izan du aritzeko parada. Erraterako, «nonbait pausatzeko» beharra sentitzen zuen, eta duela zenbait urte Elise Zicler tatuatzailea ezagutu zuenean, «begi bistakoa» izan zitzaien proiektu bat eramanen zutela elkarrekin.
Izan ere, tatuaje denda batean ezagutu zuten elkar bi artistek. Ziclerrek moda ikasketak egin zituen, Parisen eta Hendaian egin zuen lan, eta tatuatzen ikasi du azken urteetan. Denda baten irekitzeko gogoa zuen bere bi lanbideak uztartzeko, eta argi zuen toki horretan «artisten emulazio bat» gertatuko zela. Bien ideien trukaketaren emaitza da Coeur Coeur Club, eta proiektuaren muinarekin ados dira biak: gunea «kolektiboa, hibridoa eta diziplinartekoa» izanen da.
«Gure helburua gune herrikoi eta sozial bat egitea da, denei irekia, zeinetan garen bezalakoak izaten ahal garen».
BIXENTE PEREZ Ile apaintzailea eta makillatzailea
Administratiboki, bakoitza autonomo gisa arituko da dendan, «nork bere askatasuna» ukaiteko hemendik aitzina ere. Enpresa proiektuak laguntzeko Lan Berri elkartearen laguntza ukan dute, eta, lokala arras prest izan gabe ere, denda zabaldu dute aste honetan, lagunei esker obrak aitzinatu ahal izan dituztelako. Halere, oraindik anitz gauza dituzte egiteko; besteak bete, haiekin proiektuan parte hartuko duten bete artista batzuk atzematea.
Harremanean
Perezen arabera, lokalaren kokapena biziki garrantzitsua da, karrikara buruz ematen baitu, eta jendeengana iristeko parada ona baita: «Gune herrikoi eta sozial bat egitea da gure helburua, denei irekia, zeinetan garen bezalakoak izaten ahal garen. Sortzeko toki bat izatea nahi genuke, bai guretzat, baita inspiratzen gaituzten artistentzat ere». Bide horretatik, gunea partekatzera etorri nahi duten artistak «gunearekin engaiatuak» izatea nahiko lukete biek. Zicleren ustez, ezinbestekoa da han lan eginen dutenen artean hartu-emana izatea: «Guk ez dugu soilik gela bat alokatu nahi artista edo sortzaile batentzat. Zinez, elkarrekin haztea litzateke gure xedea, batak bestea elikatzea, eta gunea elikatzea ere bai».
«Guk ez dugu soilik gela bat alokatu nahi artista edo sortzaile batentzat. Zinez, elkarrekin haztea litzateke gure xedea, batak bestea elikatzea, eta gunea elikatzea ere bai».
ELISE ZICLER Tatuatzailea eta moda diseinatzailea
Orrazkerez eta tatuajeez gain, bestelako sorkuntzak egiteko xedea dute Perezek eta Ziclerrek. «Zerendako ez jantziak edo bitxiak?», proposatu du Ziclerrek. Horretarako, Coeur Coeur Clubek sorkuntzak saltzeko denda bat izanen du, bertan ekoitziko dituzten objektuak saltzeko. Bestalde, erakusketak ere ezarri nahiko lituzkete, eta kari batzuetara gaualdi bereziak antolatu. Erraterako, Baionako besten denboran, bilo mozte lasterrak eta tatuaje lasterrak eginen dituzte.
Berantago, urrian, bularreko minbiziaren sentsibilizazio hilabetearen karietara, ekitaldi bereziak eginen dituzte tatuajearen inguruan. Ziclerrentzat zinez «ederra» da bularreko minbizia izan duten emazteei tatuajeak egitea, «berreraikitze prozesuan laguntzen» dituelako.
