Greziako mitologia aberatsera jo du Giorgos Papandreu hango lehen ministroak Alemaniari laguntza eskatzeko. Ez du Sisifo izan nahi, ezertarako balioko ez duen lan batera —zorrak pagatzera— betirako kondenatuta. Ez, berak Itakara iritsi nahi du, helmuga idealera, europar guztiak alemaniarrak izango diren garai batera: zintzoak, langileak eta hitzekoak. Horretarako, alemaniarren eta beste europarron dirua behar du lehenik, eta horretan aritu zen atzo Alemaniako patronalaren aurrean. Enpresaburuek txalo artean hartu zuten Papandreuren hitzaldia, entzun nahi zutena esan zielako: konpromisoak beteko dituela eta zorra pagatuko duela, Alemaniako Estatuari eta hango bankuei barne.
Baina mitoak guztiz kontrolatzen ez den errealitatea azaltzeko asmatutako ipuinak dira, eta halako itxura hartzen ari dira Papandreuren promesak ere. Mundu errealago batean mitoek baino indar handiagoa dute atzeraldiak, greziarren haserreak eta Grezia gaurko egoerara bultzatu duten hainbat eta hainbat akatsek.
Hizpideak
Sisiforen lanak
Iruzkinak
Ez dago iruzkinik
Ordenatu
