Lerroburuak sexu erasoei buruzko aipamenez josi dira berriz, agertokiak askotarikoak izanik ere: berdin da den eskola, den eliza, den osteopatia kontsulta. Besteak beste, Patxi Ezkiagaren zein Getxoko ikastetxe bateko irakasle baten kontrako salaketak izan dituzte hizpide BerriaFMn podcastean. Eta ideia bat azpimarratu dute: biktimari sinestearen garrantzia.

Nerabeak eta gimnasioa ditu hizpide Berriketan saioaren atal honek. Geroz eta gehiago dira gimnasiora joaten diren nerabe eta gazteak, gorputza eraldatzeko asmoz, eta askotan erabilera oker eta kaltegarria egiten dute. Gaiaren inguruko gako nagusiak azaldu dizkigu Jone Arruabarrena Gipuzkoako Hitza-ko kazetariak.

Patriarkatua, antitziganismoa eta klasismoa gurutzatzen dira emakume ijitoen bizitzan, Kera elkarteko Palmira Dualek (Irun, Gipuzkoa, 1996) azaldu duenez.

Euskara eta erromania batzen dituen hizkeran, erromintxelan, kera hitzak etxea esan nahi du. Hain zuzen ere, Kera elkarteko kideek zera nahi dute, Euskal Herriko emakume ijitoak «etxean bezala» sentitzea haienean daudenean.

Espainiako Kopako finala jokatu du Realak, eta lehenbiziko mailara igotzear izan da Osasuna. Biek egin dute kale, baina BerriaFMri abagune ederra iruditu zaio emakumezkoen futbola izateko hizpide.

Ainhoa Tirapu, Ane Azkona, Arene Altonaga eta Jone Bastida lagun, hizpide izan dituzte lan baldintzak, ikusgaitasuna, futbol sistemaren barreneko biolentziak eta egiteko dagoen bidea [seigarren minututik aurrera].

Sare sozialek duten potentzial positiboa bigarren mailara pasatu dela uste du heziketa digitalean aditu Julen Linazasorok. Horregatik, sare sozialak erabiltzeko adina 18 urtekoa izan behar ote den eztabaidatzeko garaia iritsi dela uste du.

Gazako zerrendako egoera du hizpide 'Berriketan' saioaren atal honek. Duela 76 urte sortu zen Israel, eta 700.000 palestinar baino gehiago etxea uztera behartu zituzten. Nakba (Hondamendia) deitzen diote urtero maiatzaren 15ean oroitzen duten aldi horri.

1936ko gerran hasi eta 1948 arte Nafarroan hildako 95 emakumeren izen-deiturak eta istorioak bildu dituzte Amaia Kowasch eta Aitor Garjon ikerlariek liburu batean, eta Txalapartarekin argitaratu dute.

Txikitatik ezagutzen dute elkar Kami Magassak (2003) eta Mariam Traorek (2006). Malin jaiotako iruindarrak dira, eta Black Power kolektiboko kideak. Afrikar jatorriko hogei emakume gazte inguruk egin dute bat talde horretan, arrazakeriaren aurka lan egiteko.

Zornotzako hilerrian zeuden lurperatuta, eta Aranzadik topatu eta identifikatu ditu. 1936ko gerran senideren bat desagertu zitzaien herritarrei DNA lagina uzteko eskatu diete.