Nerea Osinalde EHUko Biokimika Saileko irakasleak, bere iritzi zutabean, kontatzen du zergatik hasi ginen musuak ematen. Musuak afektuarekin eta maitasunarekin erlazionatzen ditugula dio, baina, dioenez, hori ez da gertatzen munduko kultura askotan.

Mediterraneoan jazo diren uholdeen berri ematerakoan kazetari batek egin duen iruzurra kritikatu du bere iritzi zutabean Andoni Egaña bertsolariak. Halako albisteak ongi transmititzeko izaten diren zailtasunak ere azpimarratu ditu.

Maialen Akizu bertsolaria eta idazleak balizko eztabaida bati buruzko kontakizun bat egin du bere eguneroko iritzi zutabean, eztabaida bat nola izan erabakitzeko ere eztabaida bat izaten duen norbaiten azaletik.

Martxelo Otamendik hizpide ditu bere zutabean Alex Sardui Gatibu taldeko kantariak eginiko azken adierazpenak. Kantariak esan zuen musikan ez dagoela genero diskriminaziorik, eta Otamendik dio esparru guztietan dagoela diskriminazioa, emakumeek gizonei behin eta berriro gogoratu dieten bezala.

Cambrils herrian (Tarragona, Katalunia) udan aurkitu duten koaderno baten jabearen bila idatzi du bere zutabea Garazi Kamio Anduaga kazetari eta idazleak. Araitz izena dakar koadernoak azalean idatzita, eta Pello Añorga ipuin kontalari eta idazlearen sinadura barruko orrialdeetan.

Frantzian 51 gizonen aurka hasi den epaiketa baten harira idatzi du zutabea Onintza Enbeitak. Emakume bat hamar urtez bortxatzea egozten diete gizon horiei. Aurrez, drogatu egiten zuen emakumea bere senarrak.

Batxilergoko ikasleekin akordio bat egin du Danel Abando irakasleak: astegunetan euskarazko artikulu bat irakurtzea komunean kaka egiten ari diren bitartean. Irakasleak bidali dizkie artikuluak, ulermena landu eta lexikoa aberasteko asmoz.

Orereta ikastolako irakasle Haizea Saez de Eguilaz Perez irakasleak iritzi artikulu batean bildu ditu BERRIA Ikasgelaren kazetaritza tailerretan ikasi eta ikusi dutena.

Euskaldunen belaunaldi berriei begira lanean ari den komunikabide bat bertatik bertara ezagutzeko esperientzia txalotu du.

Sare sozialek duten potentzial positiboa bigarren mailara pasatu dela uste du heziketa digitalean aditu Julen Linazasorok. Horregatik, sare sozialak erabiltzeko adina 18 urtekoa izan behar ote den eztabaidatzeko garaia iritsi dela uste du.