Palestinarren erdiak Palestinatik kanpo bizi dira; hainbat, Euskal Herrian. Taher Ali (Madril, 1990) Europan jaioa da, eta 2020tik bizi da Bilbon. Senideak ditu Gazan; bi lehengusu hil dizkiote.

Al Yudur mugimenduko kidea da Ali. Palestinako diasporako gazteek osatzen dute Al Yudur —erroak esan nahi du, arabieraz—, eta haien sustraiei lotuta mantentzea dute helburu.

Elhuyarrek 'Erresistente' izeneko dokumentala ondu du, eta Bego Zubia Gallastegi da zuzendaria eta gidoilaria (Arrasate, Gipuzkoa, 1965). Lanaren helburua: antibiotikoak desegoki erabiltzearen ondorioz sortutako bakterio erresistenteen arazoa gizarteratzea. Izan ere, bakterio erresistenteen arazoak 33.000 hildako eragiten ditu urtean.

Gero eta herri gehiagotan antolatzen dute Gau Beltza urriaren 31n. Euskaltzaleen Topaguneak urteak daramatza ospakizun horretarako baliabideak eskaintzen.

Webgune bat ere sortu dute: gaubeltza.eus. Bertan eskaini du prestakuntza saio bat Topaguneko kultura teknikari Ainhoa Luz Ardanzak (Ermua, Bizkaia, 1981).

«Beharrezkoa» eta «urgentziazkoa»; hala definitu du Fermin Muguruza musikari eta zinemagileak (Irun, Gipuzkoa, 1963) bere azken lana: 'Bidasoa 2018-2023' dokumentala. Donostiako Zinemaldian aurkeztu du.

Migratzaileek Europara iristeko egindako bidaia kontatzen du filmak, Bidasoa inguruan hildakoak gogoratuta, eta indarkeriaz inposatutako mugak eta kontrol arrazistak salatzen ditu.

Mohammed (Teheran, 1999) 2020ko otsailean iritsi zen Irandik Lesbosera (Grezia), haren sorterrian indarrean zegoen «erregimen islamista jasangaitza» zela eta. Irandik Turkiara aurrena, eta handik Lesbosera gero, itsasoz amesgaiztoz jositako bidaia egin ondotik.

Asiloa noiz emango dioten zain dago. Bien bitartean, Zaporeak gobernuz kanpoko erakundeko okina da Kara Tepe kanpalekuan. Bertan elkarrizketatu du BERRIAko kazetariak.

Aranzadi zientzia elkarteak aurkikuntza esanguratsu bat egin du San Adriango kobako aurtengo indusketan, Gipuzkoa eta Araba arteko pasabidean, Aratz-Aizkorri mendilerroan: harrizko tresna batzuk eta gizakiek erabilitako animalia hezurrak.

Berezia da haien jatorria: neandertalenak dira, duela 40.000 urtekoak gutxienez.

Berrogeialdian Tiktok plataforman bideoak jartzen hasi zen Iker Alvarez (Anoeta, Gipuzkoa, 2003), eta, orduz geroztik, ez da gelditu. Modari buruzko bideoak egiten ditu, zapatilei eta arropari buruzkoak, eta, gaur-gaurkoz, bizitzeko adina diru lortzen du sare sozialetatik. Erdaraz aritzen da.

Generoak matematika ikasgeletan zer forma hartzen dituen aztertu du Uzuri Albizu Malleak (Munitibar, Bizkaia, 1989) Matematika, hezkuntza eta generoa gurutzatzen diren lekuak bere doktore tesian. Azaldu duenez, neskak 6 urterekin hasten dira beren adimen gaitasuna gutxiesten: «Ikasia da».

Euskal Herriko Eskolarteko Bertso Txapelketa irabazi du bigarren aldikoz Aizpurua Ibargaraik (Sara, 2006). Aste bat lehenago, Ipar Euskal Herrikoa irabazi zuen. Heldu den urtekoa azken eskolartekoa izanen du, 18 urtera heltzearekin. Baionako Bernat Etxepare lizeoan da ikasle, eta eskubaloian ari da Hendaian.