Euskarazko eduki digitalak kontsumitzeaz gain ekoizten ere hasteko, Memeka lehiaketa antolatu dute Iametzak eta Azkue fundazioak.

15 eta 18 urte bitartekoentzat pentsatua dago, eta apirilaren 21era arte dago memeak sortzeko aukera.

Maiatzaren 3an iragarriko dituzte irabazleak, eta 200-150 euroko sariak banatuko dituzte.

Europarlamentuak bide eman dio Natura Leheneratzeko Araudiari. Alderdi Popularrak kontrako botoa eskatu du, nekazarientzat kaltegarria izango dela argudiatuta.

Estatu bakoitzak ekosistemak leheneratzeko plan bat ondu beharko du.

Nahia Garcia nerabearen familia kexu da ikasgelan duen egoeraz: gorreria du, eta ikasgelan interpreterik gabe dago askotan. Hezkuntza Sailaren arabera, profesional falta da motiboa.

Izotzean sortzen diren burbuila txikiak ikertzen dituzte Izotzalaben, Leioan. Han gordeta daude atmosferaren aztarnak. Burbuila fitxategi horri esker, ikertzaileek jakin dezakete nolakoa zen duela 800.000 urteko atmosfera, eta gerora zer bilakaera izan duen.

Ondorio argi bat atera dute: «Izotzean ikusten da nola gaur egun dugun berotzea orain arteko erregistroetan agertzen dena baino askoz handiagoa den».

Sexu berekoen arteko ezkontzak baimentzen dituen Europako 21. herrialdea bihurtu da Grezia, eta herrialde kristau ortodoxoen artean, lehena. Erabakiak harrabotsa eragin du kontserbadoreen artean.

Ekai Lersundi gazteak bere buruaz beste egin zueneko seigarren urteurrenean (otsailaren 15ean) onartu da EAEko trans legea; eta txalo artean hartu dute Eusko Legebiltzarra bete duten trans eta LGTBI kolektiboetako kideek.

Adostasun handiz erabaki dute indarrean zegoen legea aldatzea: EAJk, EH Bilduk, PSEk eta Elkarrekin Podemos-IUk babestu dute moldaketa.

Eusko Jaurlaritzak ondu du bilduma, haur eta nerabeen ardura dutenei jarraibide batzuk eskaintzeko asmoz eta, adingabeek informazioaren eta komunikazioaren teknologiak «arduraz eta segurtasunez» erabil ditzaten.

Bilduma online eskuratu daiteke, www.euskadi.eus/familia webgunean.

Geroz eta gehiago dira bideojokoen industrian hasi nahi duten gazteak. Sektorea berrituz eta garatuz doa etengabe, baina arlo askotako «profesional kualifikatuak» behar dira kalitatezko bideojokoak sortzeko.

Burdin Aroko Nafarroako aztarnategi nagusietako bat da La Custodia, Viana ondoan. Ikerketek agerian jarri dute Erromako soldaduek Sertorioren aginduetara han egin zuten sarraskia, eta erromatartzearen garaiko bizitzaren xehetasun asko.