Joseba Sarrionandia idazlea Euskal Herrira itzuli da

Anboto aldizkariak eman zuen Sarrionandiaren Euskal Herriratzearen berri, harekin eginiko elkarrizketa argitaratzearekin batera. Elkarrizketan, Sarrionandiak aitortu zuen «diskrezioz» itzuli nahi zuela, «gustura» dagoela senide eta lagunak berriro ikusita, eta sorterria zeharo aldatuta topatu duela: «Ez nuen Ertzaintza ezagutzen, ETB ere ez dut sekula zuzenean ikusi, harrituta nago hainbeste errotondagaz... Oso diferentea da dena». Hutsuneak ere sumatu ditu: «Denborak pertsona asko jaten du. Apur bat arraroa da sobrebibiente sentsazio hau».